20 მაისს არის ხსენება ღირსი იოანე ზედაზნელისა და მისი თორმეტი მოწაფისა: აბიბოს ნეკრესელისა, ანტონ მარტყოფელისა, დავით გარეჯელისა, ზენონ იყალთოელისა, თადეოზ სტეფანწმინდელისა, ისე წილკნელისა, იოსებ ალავერდელისა, ისიდორე სამთავნელისა, მიქაელ ულუმბოელისა, პიროს ბრეთელისა, სტეფანე ხირსელისა და შიო მღვიმელისა.

ასურეთიდან საქართველოსკენ წარმოემართა ცამეტი ღირსი მამა. მათ, ვით ცეცხლის სვეტი, წინ უძღოდა ყოვლადწმიდა ღვთისმშობლის კურთხევა და, უფლისმიერი ღრუბლის მსგავსად, ნამს ამცვრევდა და აგრილებდა.
მოაღწიეს სანატრელ მცხეთას, იგემეს ღვთაებრივი მირონი სვეტიცხოვლის ძირიდან აღმომდინარე წყაროდან. მოისვენეს მცირე ხანი. შემდგომ ლოცვით განწმინდეს ზედაზნის მთა და იქ დასახლდნენ. მალე წმიდა იოანემ თავისი სულიერი შვილები დალოცა და საქადაგებლად გაუშვა. ზოგი ქართლში წავიდა სამოღვაწეოდ, ზოგიც - კახეთს.

წმიდა ასურელ მამათა მიერ დაარსებულ ლავრებსა და სავანეებში იწვრთნებოდნენ ქართველთა შვილები გონებით და ზნეობით, ამ უდაბნოებიდან ეფინებოდა ქართველობას მადლი და კურთხევა. ეს სავანეები და მათი დამაარსებელი წმინდა მამები გახდნენ ქართველთა მფარველნი და მათი დამცველნი უსჯულოებისა და ბიწიერებისაგან.

ცამეტი ასურელი მამის მადლმა დალოცოს და გააძლიეროს სრულიად საქართველო! ამინ!