წმინდა ირინარქი მონაზვნად აღიკვეცა სოლოვეცის მონასტერში და მოშურნედ მოსაგრეობდა. 1614 წელს იღუმენ ანტონის გარდაცვალების შემდეგ მონასტრის წინამძღვრად აირჩიეს.
იმ დროს სოლოვეცის მონასტერს დიდი მნიშვნელობა ჰქონდა დანიელთა და შვედების შემოტევებისგან ჩრდილოეთ რუსეთის დაცვისას. წმინდა ირინარქმა გაამაგრა მონასტერი, სავანეს გარს დიდი, კოშკებიანი გალავანი შემოარტყა. წინამძღვარი მონასტრის სულიერი გაძლიერებისთვისაც ბევრს ზრუნავდა. თავმდაბალი, მშვიდი, მუდმივად ღმერთზე მოფიქრალი, მისაბაძი იყო მონაზვნებისთვის. მისი სულიერი წინამძღვრობით მონასტერში ბევრი ღირსი მამა აღიზარდა. სიცოცხლის ბოლო წლებში დაეყუდა. წმინდა ირინარქი 1628 წლის 17 ივლისს გარდაიცვალა.
