ეკლესია ფაქიზი მარგალიტია, უნდა მოვუფრთხილდეთ მას, - ამის შესახებ ჟურნალისტებს საპატრიარქოსთან წმინდა სინოდის სხდომის დაწყებამდე წილკნის მიტროპოლიტმა ზოსიმემ განუცხადა.

მისივე თქმით, წმინდა სინოდის სხდომაზე ეკლესიის მოფრთხილების შესახებ იქნება საუბარი.

მეუფისთვის უცნობია, იქნება თუ არა საუბარი კონკრეტულად ბრალდებული დეკანოზის გიორგი მამალაძის საქმესთან დაკავშირებით.

მიტროპოლიტის განცხადებით, სინოდის სხდომაზე გუშინდელ ვიდეოჩანაწერებზე საუბარი უწმინდესის ნებაა.

"ეკლესიის მოფრთხილებაა საჭირო. ეკლესია ფაქიზი მარგალიტია, უნდა მოვუფრთხილდეთ მას", - განაცხადა მეუფე ზოსიმემ.

საპატრიარქოში წმინდა სინოდის სხდომა უკვე მიმდინარეობს. წელს სინოდი პირველად შეიკრიბა და სავარაუდოდ, მასზე დეკანოზ გიორგი მამალაძის საქმეზე და ეკლესიისთვის სხვა პრობლემატურ საკითხებზე იქნება მსჯელობა.

სხდომას სრულიად საქართველოს კათოლიკოს-პატრიარქი ილია მეორე ხელმძღვანელობს.

სხდომის დასრულების შემდეგ, შესაძლოა დღესვე, განჩინება გამოქვეყნდეს, რომელშიც ასახული იქნება, თუ რა საკითხებზე იმსჯელა სინოდმა.