რუმინეთის მართლმადიდებელი ეკლესიის წმინდა სინოდმა გამოხატა თავისი დამოკიდებულება დოკუმენტებისადმი, რომლებიც ივნისში კრეტაზე ჩატარებულ კრებაზე მიიღეს. განხილვა 29 ოქტომბერს, სინოდის სხდომაზე მოხდა.

სინდომა პირველ რიგში აღნიშნა პატრიარქ დანიელისა და რუმინეთის ეკლესიის დელეგაციის სხვა წევრების მნიშვნელოვანი წვლილი მართლმადიდებელი ეკლესიის დიდი კრების მუშაობაში.

წმინდა სინოდმა დაამტკიცა კრეტაზე მიღებული დოკუმენტების და კრების მიმართვის შინაარსი. "მართლმადიდებელი ეკლესიის წმინდა და დიდმა კრებამ არ მოახდინა ახალი დოგმატების, ახალი კანონების ან ლიტურგიკული სიახლეების ფორმულირება, მან დაადასტურა, რომ მართლმადიდებელი ეკლესია არის ერთი წმინდა, კათოლიკე და სამოციქულო ეკლესია ქრისტესი" - ნათქვამია რუმინეთის მართლმადიდებელი ეკლესიის საიტზე.

გარდა ამისა, რუმინეთის ეკლესიის სინოდმა აღნიშნა, რომ დოკუმენტები შეიძლება აიხსნას, ნიუანსირდეს და გადამუშავდეს მართლმადიდებელი ეკლესიის მომავალ კრებაზე. თუმცა ახალი დოკუმენტების მიღება და დამუშავება არ უნდა მოხდეს დროის უკმარისობის პირობებში. საერთომართლმადიდებლური კონსენსუსის არარსებობისას დოკუმენტები უნდა გადაიდოს იმ დრომდე, ვიდრე კონსენსუსი არ იქნება მიღწეული. 

კუნძულ კრეტაზე მართლმადიდებელთა კრება 16-26 ივნისს ჩატარდა. კრების რეგლამენტთან და ზოგიერთ დოკუმენტთან უთანხმოების გამო კრებაში მონაწილეობაზე უარი განაცხადა ოთხმა ადგილობრივმა მართლმადიდებელმა ეკლესიამ: ანტიოქიის, რუსეთის, საქართველოსა და ბულგარეთის.