ვარდების მოედანზე საშობაო ალილოს მონაწილეები იკრიბებიან. ტრადიციული საშობაო მსვლელობა 14:00 საათზე დაიწყება. ადგილზე იმყოფებიან სასულიერო პირები, მრევლი და სტიქაროსნები. ასევე მწყემსები, "მოგვები". ურმები დატვირთულია ნობათით. ვარდების მოედანზეა დეკორატიული სპილოები, აქლემები, ჟირაფები, კუ. საკმეველს აკმევენ, ისმის გალობის ხმა.
მსვლელობის მონაწილეები გაივლიან რუსთაველის გამზირს, თავისუფლების მოედანს, პუშკინისა და ბარათაშვილის ქუჩებს, ელენე ახვლედიანის აღმართით კი პრეზიდენტის სასახლესთან მივლენ. მსვლელობა ყოვლადწმინდა სამების ტაძარში დასრულდება, სადაც სასულიერო პირები პარაკლისს გადაიხდიან.
ალილოს მონაწილეები ჯერ რუსთაველზე, პარლამენტის შენობის წინ შეჩერდებიან, შემდეგ თავისუფლების მოედანზე, საკრებულოს შენობასთან, სადაც მათ დედაქალაქის მერი და საკრებულოს თავმჯდომარე ტკბილეულით დახვდებათ. მონაწილეთა ჯგუფი "კონკადან" საპატრიარქოში შევა, სადაც მათ სრულიად საქართველოს კათოლიკოს-პატრიარქი დალოცავს და ალილოსთვის ტკბილეულს გადასცემს. შემდეგ მსვლელობის მონაწილეები პრეზიდენტის სასახლისკენ გადაინაცვლებენ, სადაც მათ ტკბილეულს პრეზიდენტი გადასცემს და მსვლელობაში მონაწილეებს შობას მიულოცავს.
ხარ-კამეჩით, ურმებით მოხდება შემოწირულობის შეგროვება. გზადაგზა მოსახლეობა ალილოს მონაწილეებს ტკბილეულსა და საჩუქრებს გადასცემს.
ყოვლადწმინდა სამების ტაძარში მიტანილი შემოწირულობები შემდეგ ბავშვთა სახლებსა და უმწეოთა თავშესაფრებში გადანაწილდება.
საქართველოში ალილოს ტრადიცია სათავეს V-VI საუკუნიდან იღებს. მისი აღნიშვნა ბოლო რამდენიმე წელია ისევ აღდგა.