მე მუდამ ვგრძნობდი უფლის სიახლოვეს, რომელსაც ეჭირა ჩემი ხელი და მატარებდა ურთულეს გზებზე, - ამის შესახებ სრულიად საქართველოს კათოლიკოს-პატრიარქმა, უწმინდესმა და უნეტარესმა, ილია მეორემ სადღესასწაულო საღმრთო ლიტურგიის დასრულების შემდეგ ქადაგებისას განაცხადა.
წირვის დასრულების შემდეგ ტაძარში შეკრებილთ ჯერ მეუფე დანიელმა მიმართა, რომელმაც უწმინდესის ღვაწლზე ისაუბრა და ის ურთულესი პერიოდები გაიხსენა, რომელშიც უწმინდესს უწევდა მოღვაწეობა. მეუფე დანიელის თქმით, უფალმა პატრიარქს დააკისრა მისია, იმედი არ გაეცრუებინა ერისათვის და ამ რამდენიმე ათეული წლის განმავლობაში ჩვენ დავინახეთ ეკლესიისადმი ადამიანების შეუქცევადი შემობრუნება.
სრულიად საქართველოს კათოლიკოს-პატრიარქის უწმინდესის და უნეტარესის თქმით, 38 წლის განმავლობაში ბევრი რამ გაკეთდა ღვთის მადლითა და შეწევნით.
"მე ვმადლობ უფალს მისი დიდი წყალობისათვის. ამ წლების მანძილზე მე მუდამ ვგრძნობდი უფლის სიახლოვეს, რომელსაც უჭირავს ჩემი ხელი და მატარებს ურთულეს გზებზე. უფალს ძალიან უყვარს საქართველო და მთელი მსოფლიო, ძალიან ხშირად გვიგზავნის განსაცდელებს, მაგრამ არასდროს არ გვშორდება. წყალობა უფლისა და მადლი ღვთისა გფარავდეთ თქვენ და სრულიად საქართველოს. დალოცვილი და გახარებული გამყოფოთ მამაზეციერმა", - ბრძანა უწმინდესმა.
პატრიარქმა ამბიონზე მიიწვია ტაძარში მყოფი ყოფილი პრემიერ-მინისტრი ბიძინა ივანიშვილი, პრემიერ-მინისტრობის მოვალეობის შემსრულებელი ირაკლი ღარიბაშვილი და პრემიერ-მინისტრობის კანდიდატი გიორგი კვირიკაშვილი. ბიძინა ივანიშვილი და ირაკლი ღარიბაშვილი ტაძარში მეუღლეებთან ერთად იმყოფებოდნენ. პატრიარქმა ყველა მათგანი დალოცა.
სრულიად საქართველოს კათოლიკოს-პატრიარქის, ილია მეორის აღსაყდრების 38-ე საიუბილეო წელთან დაკავშირებით სამების ტაძრის ცენტრალურ დარბაზში გამოფენა გაიხსნა.