სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა ილია მეორემ დღევანდელ ქადაგებაზე მაქსიმე აღმსარებლის საფლავის აღმოჩენის მნიშვნელობაზე ისაუბრა.

როგორც მისმა უწმინდესობამ აღნიშნა, საქართველო მდიდარია თავისი სიწმინდეებით და წმინდა მამებით და ერთ-ერთი გამოჩენილი წმინდა მამა, რომელიც საქართველოში განისვენებს, არის მაქსიმე აღმსარებელი. პატრიარქის თქმით, საუკუნეების განმავლობაში იყო დავა, თუ სად არის დასაფლავებული მაქსიმე აღმსარებელი და ამ თემაზე საქართველოში 5 კონფერენცია ჩატარდა. ხოლო მაქსიმე აღმსარებლისადმი მიძღვნილი მეხუთე საერთაშორისო საღვთისმეტყველო კონფერენციამ, რომელიც მიმდინარე წლის 19-23 ოქტომბერს გაიმართა, დაადასტურა, რომ მაქსიმე აღმსარებლის სხეული ნაპოვნია და იგი დაკრძალულია ცაგერის მახლობლად, მორისციხეში მდებარე მაქსიმე აღმსარებლის სახელობის მონასტერში.
"ეს არის მსოფლიოში ძალიან მნიშვნელოვანი აღმოჩენა და მე მინდა ვთქვა, რომ განსაკუთრებული შრომა ამისთვის გასწია მეუფე სტეფანემ", - აღნიშნა ილია მეორემ.

პატრიარქმა ცაგერისა და ლენტეხის ეპისკოპოსი, მეუფე სტეფანე აღნიშნული წვლილისთვის მიტროპოლიტის ხარისხში აიყვანა. დღევანდელი წირვის შემდეგ უწმინდესმა ასევე დააჯილდოვა რამდენიმე მღვდელმსახური და დალოცა აფხაზეთის მთავრობის თავმჯდომარის მოვალეობის შემსრულებელი ვახტან ყოლბაია და აფხაზეთში მცხოვრები ყოლბაიების გვარი.