დასრულდა საკვირველმომქმედი ხატის "დედოფალი - სიხარულის მომნიჭებელის" მოგზაურობა წმინდა მიწაზე. "დედოფალი" უკვე საქართველოშია. ამ ისტორიული მოგზაურობის შესახებ ვრცელ სტატიას ახლო მომავალში მოგაწვდით. ახლა კი გთავაზობთ ხატის მცველების მოკლე ინფორმაციას:

"უდიდესი მოვლენებით იყო სავსე ეს გზა, გზა რომელიც მართლაც რომ იყო ისტორიული და ძალიან ამაღელვებელი. ვერ წარმოვიდგენდით წინასწარ თუ ასეთი ემოციური და მოვლენებით სავსე იქნებოდა ღვთისმშობლის სტუმრობა იერუსალიმსა და პალესტინაში. მოლოდინი რასაკვირველია დიდი იყო, მაგრამ ზოგჯერ ხდება ისეთი ფაქტებიც, რომელსაც წინასწარ ვერ განჭვრეტ და ეს მხოლოდ ღვთისმშობლისთვისაა ცნობილი. საოცრება იყო "დედოფლის" გამოჩენა იერუსალიმში. ჩასვლიდან მეორე დილასვე, როგორც კი ხატი იერუსალიმის ქუჩებში გამოჩნდა, უამრავი მომლოცველი მოიზიდა.

მაცხოვრის აღდგომის ტაძრის მოედნის გავლას ორმოც წუთზე მეტი მოვანდომეთ იმდენად ბევრი იყო მომლოცველი. განსაცვიფრებელი იყო ის ფაქტიც, რომ მაშინ როდესაც იერუსალიმში ამდენი სიწმინდის მოსალოცადაა ხალხი ჩამოსული, თითქოს ავიწყდებოდათ სად იყვნენ და უმალ "დედოფლისკენ" მოიწევდნენ. მართლაც განსაკუთრებულად დიდი მადლი და სითბო მოდის "დედოფლისგან". დაუვიწყარი იქნება ღვთისმშობლის პირველი სტუმრობა უფლის საფლავზე, როდესაც კუვუკლიის მცველებმა "დედოფალს" დერეფანი გაუკეთეს, მომლოცველები აქეთ-იქით გასწიეს და დიდი თაყვანისცემითა და მოწიწებით შეგვაბრძანებინეს ხატი უფლის საფლავზე. გარკვეული დროით კუვუკლია დაიკეტა სანამ ხატს არ გამოვაბრძანებდით.რაოდენ დიდი მადლი მოდის ხატისგან, რომ პირველსაცე დღეს უკვე დაეტყო იერუსალიმს "დედოფლის" ჩაბრძანება.

სხვადასხვა მონასტრის წინამძღვრები გვიწვევდნენ წირვებზე მათ მონასტრებში და თხოვნით მოგვმართვდნენ, რომ მათთანაც მიბრძანებულიყო ყოვლადწმინდა ღვთისმშობელი. ასე მიგვიწვიეს წირვაზე ღვთისმშობლის საფლავზეც, სადაც წირვის დროს "დედოფალი" ღვთისმშობლის საფლავზე იყო დაბრძანებული საპატიოდ. ჩვენი განრიგი მეტად რთული იყო, დილა მუდამ გამთენიისას 5 საათზე იწყებოდა და დრე გვიან ღამემდე გრძელდებოდა, ამას ემატებოდა წირვებიც, რომლებიც იქ ხშირად ღამით მიმდინარეობს, ასე მაცხოვრის საფლავზეც სადაც მიბრძანებული იყო წირვის დროს "დედოფალიც". არ დარჩენილა სიწმინდე, რომელსაც დედოფალი არ სტუმრებოდეს. ყველაფერთან ერთად "დედოფლის" მოგზაურობა ბევრი საფრთხის შემცველიც იყო. ახლა ისრაელი კვლავ საომარი სიტუაციის წინაშე დგას, არაერთხელ გამოაცხადეს, რომ ქალაქში ტერორისტები იყვნენ და რამოდენიმე ტერაქტიც მოხდა. ყოველ ღამე თუ დღისით ხდებოდა მკვლელობები.

რამოდენიმე დღე ძველი ქალაქის კარიბჭეები დაკეტილი იყო შემსვლელთათვის. საკმაოდ რთული აღმოჩნდა გამგზავრება პალესტინაშიც სადაც, ნიღბიანი პალესტინელების გარემოცვაში აღმოვჩნდით და მხოლოდ ღვთისმშობლის შეწევნით გამოვაღწიეთ იქედან ცოცხლებმა. მიუხედავად ამ დაძაბული ვითარებისა ყოველი დღე იყო ნაყოფიერი შეხვედრებით სავსეც. ჩვენ გვქონდა შეხვედრა იერუსალიმის პატრიარქთანაც,შეხვედრის დასასრულს მისმა უწმინდესობამ მოილოცა "დედოფალი" და გზა დაგვილოცა. უამრავი მნიშვნელოვანი რამ მოხდა წმინდა მიწაზე და დედოფალმაც ბევრი სასწაული გვაჩვენა, თუმცა ამ ისტორიებს უფრო მოგვიანებით გიამბობთ. გზა იყო რთული და მძიმე, მაგრამ უმთავრესი მაინც ის მადლია, რომელიც საქართველოში ჩამოგიტანეთ".