სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე 20 სექტემბერს მახათას მთაზე მშენებარე ივერიის ღვთისმშობლის ხატის სახელობის ტაძრის გუმბათის ჯვარს აკურთხებს.

ივერიის ღვთისმშობლის სახელობის ტაძრის მშენებლობის ფონდის "ივერიისა" გავრცელებული ინფორმაციით, ჯვრის მოლოცვა თბილისში მცხოვრებ და დედაქალაქში სპეციალურად ამ მოვლენისთვის ჩამოსულ ნებისმიერ მსურველს შეეძლება.

"საზოგადოების დიდი ინტერესის გამო, ტაძრის მშენებლობის ფონდი "ივერიისა" ქალაქ თბილისის მერიის მხარდაჭერით უზრუნველყოფს ტაძრის მიმდებარე ტერიტორიის შესაბამისად განათებას და ქალაქის სხვადასხვა კუთხიდან მოსახლეობის ტრანსპორტირებას", _ აცხადებენ ფონდში.


მათივე თქმით, მსურველებს ჯვრის მოლოცვა მთელი ღამის განმავლობაში შეეძლებათ, ხოლო ღვთისმშობლის შობის დღეს, 21 სექტემბერს, 12:00 საათზე, უწმინდესის კურთხევით, ერთობლივი ლოცვის შემდეგ, ჯვარი მახათაზე ივერიის ღვთისმშობლის ხატის სახელობის ტაძრის გუმბათზე აღიმართება.

მახათას მთაზე ივერიის ღვთისმშობლის ხატის სახელობის ტაძარს საქართველოში და უცხოეთში მცხოვრები ჩვენი თანამემამულეები ერთიანი ძალისხმევით და თანაბარი მონაწილეობით აშენებენ. დღეისათვის ტაძრის აღმშენებელთა წიგნში შეტანილია 1 200 000 სახელი და გვარი. მსურველთა გაწევრიანება გრძელდება.

"21 სექტემბერს, 12:00 საათზე, საზღვარგარეთ მცხოვრებ ჩვენს თანამემამულეებს შეუძლიათ ლოცვით შემოუერთდნენ მახათას მთაზე მშენებარე ტაძრის გუმბათზე ჯვრის აღმართვას", _ განაცხადეს ფონდში.