აწყურის ხატი სვეტიცხოვლიდან დღეს ჩამოაბრძანეს და სახალხო მსვლელობით მიაბრძანეს სამების საკათედრო ტაძარში. მსვლელობაში რამდენიმე ათეული სასულიერო პირი, მღვდელმთავარი, მონაზონი და მრევლი მონაწილეობდა.
ყოვლადწმინდა სამების საკათედრო ტაძრის ეზოში, აწყურის ღვთისმშობლის ხატთან, სრულიად საქართველოს კათოლიკოს-პატრიარქმა ილია მეორემ პარაკლისი აღასრულა. პარაკლისის დაწყებამდე პატრიარქმა შეკრებილები დალოცა და მცირე ქადაგებით მიმართა.
"ღმერთმა დალოცოს ყოველი გაჭირვებული, რომელიც შესთხოვს უფალს, იხარეთ ძენო და ასულნო საქართველოისა, დღეს ყოვლადწმინდა ღვთისმშობელი შემოვიდა საქართველოში. ხატმა განვლო გზა ანდრია პირველწოდებულისა. ღვთისმშობელი მობრძანდა საქართველოში რათა დაამშვიდოს, გაამთლიანოს საქართველო, გიხაროდეთ რამეთუ ჩვენთან არს ღმერთი", - ბრძანა ილია მეორემ ქადაგებისას.
ტაძარში დალოცვის შემდეგ უწმინდესი მღვდელმთავრებთან და სასულიერო პირებთან ერთად ტაძრის ეზოში გამობრძანდა, სადაც ამჟამად პარაკლისი სრულდება. ტაძრის ეზოში შუა ადგილზე, სპეციალურად ხატისთვის შექმნილ ადგილზე დააბრძანეს აწყურის ყოვლადწმინდა ღვთისმშობლის ხატი.
სამების ეზო და ტაძარი მომლოცველებით სავსე იყო. ვარდების მოედნიდან სამების ტარძამდე ხატს ათასობით ადამიანი მოაცილებდა.

პარაკლისის დასრულების შემდეგ უწმინდესმა შეკრებილებს მიმართა სამჯერ ეთქვათ ერთად ლოცვა ღვთისმშობლისადმი "მოწყალებისა კარი განგვიღე".
"ყველას გილოცავთ ამ დღესასწაულს. ყოვლადწმინდა ღვთისმშობელმა დედამ გადაგაფაროთ თავისი კალთა თქვენ და სრულიად საქართველოს. ამინ", - განაცხადა უწმინდესმა.
პარაკლისის დროს მგალობლებმა "ქრისტე აღდგას" საგალობლები იგალობეს. მსახურების ბოლოს მომლოცველებს პატრიარქმა კურთხევა მისცა ზეთი ეცხოთ, რის შემდეგაც, სასულიერო პირებმა ზეთისცხება დაიწყეს.
პატრიარქის ქორეპისკოპოსმა, მეუფე თეოდორემ კი განაცხადა, რომ ხვალ ოჯახის სიწმინდის დაცვის დღეა. ამასთან დაკავშირებით წირვა ხვალ, სამებაში 10.00 საათზე დაიწყება, 12.30 საათზე სრულიად საქართველოს კათოლიკოს-პატრიარქი ტაძარში პარაკლისს გადაიხდის და მრავალშვილიანი დედების დაჯილდოება მოხდება.