პატრიარქის მდივნის, დეკანოზ მიქაელ ბოტკოველის განმარტებით, სააღდგომოდ უწმინდესისა და უნეტარესის, ილია მეორის მიერ დაწესებული დღესასწაულის აღნიშვნის პროცესში დაანონსებული ცხოველების დაკვლა ერთგვარი სოციალური აქციაა და არა მსხვერპლშეწირვის რიტუალი.
როგორც მიქაელ ბოტკოველმა განაცხადა, ეს არის საზეიმო სოციალური აქცია, რომელსაც საპატრიარქო დღესასწაულის მონაწილე ადამიანებს შესთავაზებს და არა მსხვერპლშეწირვა, რაც ახალი აღთქმის მიხედვით - ქრისტიანულად - მიუღებელი მოვლენაა. ბოტკოველის თქმით, ცოდვების მონანიების მიზნით უფლისათვის ცხოველების მსხვერპლშეწირვა არ შეიძლება და საქართველოს მართლმადიდებელი ეკლესიის მეთაურს ამის გაკეთება არ უგულისხმია. მამა მიქაელს უკვირს, რატომ გამოიწვია პატრიარქის სიტყვებმა მსგავსი ასოციაცია.

"საპატრიარქოს აქამდეც არაერთი სოციალური აქცია განუხორციელებია, ეს იქნება სადღესასწაულო ტრაპეზი და ნებისმიერ მსურველს შეეძლება მობრძანდეს", - ამბობს მამა მიქაელ ბოტკოველი.

კითხვას, თუ ეს მხოლოდ სოციალური აქციაა და არა მსხვერპლშეწირვის რიტუალი, რატომ დაასახელა ილია მეორემ დასაკლავი ცხოველების კონკრეტული რაოდენობა, ბოტკოველი პასუხობს, რომ პატრიარქმა საკრალური რიცხვი 7 დაასახელა და შესაძლოა სხვა რიცხვიც ყოფილიყო, მაგალითად, 15 ცხვარი.

"სასურველია, რომ თბილისიდან მცხეთაში ფეხით ჩავიდნენ. დაიკვლება დიდი მოზვერი, 7 ცხვარი, ყოჩი და მადლობას შევწირავთ უფალს. ხალხი იქვე გაახსნილებს ამ დიდ მარხვას", - განაცხადა ილია მეორემ.

"მე მივიღე გადაწყვეტილება, რომ ჩვენ ყოველ წელიწადს, აღდგომა დღეს მადლობა უნდა შევწიროთ უფალს მისი დიდი წყალობისათვის. ამ წლიდან ყოველ წელიწადს, აღდგომა დღეს იქნება მადლობის პარაკლისი და ლოცვა ღვთისადმი. პირველ წელიწადს მე მინდა, რომ ეს მადლობის პარაკლისი, ლოცვა და წირვა სვეტიცხოველში შევასრულოთ", - ეს განცხადება უწმინდესმა და უნეტარესმა ილია მეორემ სამების საკათედრო ტაძარში საკვირაო ქადაგებისას გააკეთა.

მისივე თქმით, თბილისიდან ხალხის მსვლელობა მცხეთის მიმართულებით სააღდგომოდ შაბათს დაიწყება.