ილიას სახელმწიფო უნივერსიტეტის სტუდენტთა საინიციატივო ჯგუფის წევრები საჯარო უწყებებს მიმართავენ. ისინი უნივერსიტეტის რექტორისგან დეკანოზ თეოდორე გიგნაძის საჯარო შეხვედრების ჩასატარებლად სააქტო დარბაზის გამოყოფას ითხოვენ.

სტუდენტების განცხადებას უცვლელად გთავაზობთ:

"როგორც იცით უკვე რამოდენიმე თვეა რაც სტუდენტები რექტორატისგან ვითხოვთ სააქტო დარბაზის გამოყოფას დეკანოზ თეოდორე გიგნაძესთან საჯარო შეხვედრების ჩასატარებლად, თავისუფალი დასწრების რეჟიმში, ჩვენთვის საინტერესო საკითხებზე სასაუბროდ.

მიუხედავად ჩვენი ლეგიტიმური მოთხოვნისა სტუდენტები წავაწყდით დიდ წინააღმდეგობას უნივერსიტეტის ხელმძღვანელობის მხრიდან, რამაც გაგვაკვირვა, რადგან ილიაუნის სივრცე ღიაა ნებისმიერი სახის მომხსენებლისათვის, საჯარო შეხვედრები ტარდება სხვადასხვა სფეროს წარმომადგენლებთან, რომელთა შორის არიან თეოლოგები და სხვადახვა რელიგიური ორგანიზაციის წარმომადგენლები (დღესაც, ერთ-ერთი ქრისტიანული დენომინაციის, ევანგელისტურ-ბატისტური ეკლესიის ეპისკოპოსთან, მატონ მალხაზ სონღულაშვილთან ტარდება შეხვედრა).

თხოვნის მეტად ლეგიტიმურობისთვის გადავწყვიტეთ შეგვეგროვებინა იმ სტუდენტების ხელმოწერები რომელთაც სურდათ მამა თეოდორესთან საჯარო შეხვედრების ჩატარება. მიუხედავად ადმინისტრაციის მხრიდან დიდი წინააღმდეგობისა ხელმოწერების შეგროვების პროცესში, ჩვენ შევაგროვეთ 4500 ხელმოწერა. ეს ხელმოწერები დაურთეთ მიმართვას რექტორის სახელზე.

რექტორმა ჩვენს მიმართვას არ გასცა პირდაპირი წერილობითი პასუხი, რისი ვალდებულებაც ჰქონდა, ამის სანაცვლოდ ჩვენ მივიღეთ წერილობით შეთავაზება რომ მივსულიყავით შეხვედრაზე სადაც რექტორი უნდა შეხვედროდა სტუდენტებს და განეხილა სხვადასხვა საკითხები, რომელთაგან ერთ-ერთი იყო ჩვენი მოთხოვნა...

კონკრეტული პასუხის მისაღებად მივედით ამ შეხვედრაზე, იქ საუბარი იყო თეოლოგიის ლექციების ჩატარებაზე, სხვადასხვა მოწვეული თეოლოგების მიერ (რომელსაც მივესალმებით) მაგრამ სიტყვაც არ თქმულა 4500 სტუდენტის მიერ მოთხოვნილი, კონკრეტული სასულიერო პირის, მამა თეოდორე გიგნაძის მოწვევასთან დაკავშირებთ.

შეხვდერის შემდეგ მივედით რექტორთან და ვკითხეთ თუ რა პასუხს აძლევდა სტუდენტებს? მან გადაჭრით განგვიცხადა უარი ჩვენს მოთხოვნაზე და დასძინა, რომ სტუდენტები არ არიან კომპედენტურნი ამა თუ იმ პირის მოწვევის საკითხში და რომ ამას რექტორატი წყვიტავს (უცნაურია, წერილის მიხედვით, თითქოს სტუდენტებთან ერთად უნდა განხილულიყო მსგავსი საკითხები).

ჩვენ ვფიქრობთ რომ აღნიშნული ქმედება უხეშად არღვევს უნივერსიტეტში სტუდენტთა დამოუკიდებლობას, პლურალიზმის და სამართლიანობის პრინციპებს და არ ემყარება არანაირ ობიექტურ საფუძველს.

ირღვევა კანონის "უმაღლესი განათლების შესახებ" მე-3, მე-16 და 43-ე მუხლების ქვეპუნქტები ასევე სახეზეა ახლად მიღებული კანონის" დისკრიმინაციის ყველა ფორმის აღმოფხვრის შესახებ" პირველი და მეორე მუხლების დარღვევა სრულიად არის იგნორირებული "ილიას სახელმწიფო უნივერსიტეტში გარეშე პირთა მოწვევისა და ღონისძიების გამართვის წესის პრინციპები. სწორედ ამ გარემოებების გამო წერილობით მივმართავთ საქართველოს სახალხო დამცველს ბატონ უჩა ნანუაშვილს, დაცვის და სამოქალაქო ინტეგრაციის კომიტეტის თავმჯდომარეს ქალბატონ ეკა ბესელიას , განათლების მინისტრს თამარ სანიკიძეს, რათა განიხილონ აღნიშნული საკითხი, დაიცვან სტუდენტთა კანონიერი ინტერესები და მათი კომპეტენციის ფარგლებში მიიღონ კანონით გათვალისწინებული ზომები" - განაცხადეს სტუდენტებმა.