ილიას უნივერსიტეტის სტუდენტებმა გოდერძი ბოლქვაძემ და ირაკლი ბობოხიძემ დღეს "რეპორტიორის" პრესკლუბში გამართულ პრესკონფერენციაზე უნივესიტეტის რექტორს გიგა ზედანიას სპეციალური განცხადებით მიმართეს:

"სტუდენტთა ინიციატივით და ადმინისტრაციასთან შეთანხმებით ოქტომბრის თვეში ჩატარდა შემეცნებითი ხასიათის შეხვედრა მამა თეოდორე გიგნაძესთან, რომელსაც ყოველთვიური ხასიათი უნდა მიეღო. თუმცა შემდეგი შეხვედრის ჩატარების მოლოდინში, ჩვენთვის ცნობილი გახდა ადმინისტრაციის უარი მამა თეოდორესთან შეხვედრისთვის სივრცის გამოყოფაზე უნივერსიტეტში, რაც დადასტურდა უნივერსიტეტის საზოგადოებასთან ურთიერთობის სამსახურის უფროსის ანა კვანჭილაშვილის ჟურნალ ტაბულაში გამოქვეყნებული განცხადებით.
ვციტირებ: "ილიას სახელმწიფო უნივერსიტეტი უარს ამბობს დეკანოზ თეოდორე გიგნაძის ლექციების ჩატარებაზე", - ამ განცხადებას საფუძვლად უდევს ახლახანს, 28 ნოემბერს მიღებულ ღონისძიებათა ჩატარების წესი რომელიც მამა თეოდორესთან მოსალოდნელ მეორე შეხვედრამდე იქნა მიღებული.

აქედან გამომდინარე სტუდენტთა საინიციატივო ჯგუფმა დავიწყეთ ხელმოწერების შეგროვება იმ მოთხოვნით რომ უნივერსიტეტმა მოგვცეს შესაძლებლობა თვეში ერთხელ მოვიწვიოთ ჩვენთვის უაღრესად საინტერესო პიროვნება, დეკანოზი თეოდორე გიგნაძე. თეოლოგიურ და სხვადასხვა აქტუალურ თემებზე სასაუბროდ.

ხელმოწერების შეგროვების პროცესში ადმინისტრაციის მხრიდან ხელისშეშლის მცდელობების მიუხედავად ჩვენ გვაქვს 4500 სტუდენტის ხელმოწერა რომლებიც ითხოვენ დეკანოზ თეოდორე გიგნაძესთან ყოველთვიური შეხვედრებისთვის აუდიტორიის გამოყოფას. ეს ხელმოწერები თან ერთვის მიმართვას უნივერსიტეტის რექტორის სახელზე, რომლისგანაც ველოდებით წერილობით პასუხს აღნიშნულ მოთხოვნასთან დაკავშირებით 10 სამუშაო დღის განმავლობაში. ხაზგასმით გვინდა ვთქვათ, რომ აღნიშნული შეხვედრები არანაირად არ გულისხმობს რაიმე სახის რელიგიური რიტუალის ან კულტის მსახურებასთან დაკავშირებული ქმედებების განხორციელებას და დასწრება არის თავისუფალი. გმადლობთ ყურადღებისათვის! თუ რაიმე შეკითხვა გექნებათ მზად ვარ გიპასუხოთ..." - განაცხადეს სტუდენტებმა "რეპორტიორის" პრესკლუბში.