ამ დღეს, ფლორენციის წმ. ნინოს ქართულმა მართლმადიდებლურმა ეკლესიამ, მასთან არსებულმა სიმღერისა და ცეკვის ანსამბლმა "ნანილამ", ქართულ-იტალიურ ასოციაცია "იბერიასთან" ერთად, ქართველ ემიგრანტებსა და ამჯერად უკვე იტალიურ საზოგადოებას ულამაზესი და მრავალფეროვანი საღამო აჩუქა.
საღამოს, იტალიის პატივსაცემ საზოგადოებასა და სამღვდელოებასთან ერთად, საქართველოს ელჩი იტალიაში კარლო (კახა) სიხარულიძე და იტალიის სხვადასხვა კუთხეში (მილანი, რომი, ბარი, ნეაპოლი) არსებული ქართული მართლმადიდებლური ეკლესიების წინამძღვრებიც დაესწრნენ.
"ჩვენ მაქსიმალურად ვეცადეთ გამოგვეხატა ჩვენი დამოკიდებულება და მადლიერება იმ იტალიელების, იმ კეთილი ადამიანებისადმი, რომლებიც მხარში გვიდგანან ამ უცხო მიწაზე. ვეცადეთ გაგვეცნო მათთვის ჩვენი სამრევლო ტაძრის ფუნქციონირება, მისი დაარსების მიზანი. გაგვეცნო ჩვენი სამშობლო თავისი ისტორიითა და კულტურით; დავაგემოვნებინეთ ქართული სამზარეულო და ქართული ღვინო", - განაცხადა ჩვენთან საუბრისას საქართველოს საპატრიარქოს დასავლეთ ევროპის ეპარქიის ფლორენციის წმ. ნინოს სახელობის სამრევლო ტაძრის წინამძღვარმა არქიმანდრიტმა ანდრია ლაცაბიძემ.
საქართველოს კულტურის, ხელოვნებისა და ქართული მართლმადიდებლური ეკლესიის პრეზენტაციამ სახელწოდებით "საქართველო ხვდება იტალიას", დაძმობილებული ქართულ-იტალიური საზოგადოება სასიამოვნოდ გაოცებული და ემოციებით დატვირთული დატოვა.
... მაგრამ ყველაფერი გაცილებით ადრე დაიწყო. მამა ანდრია 2011 წლის იანვარში ქართველი მრევლის მოთხოვნით, საქართველოს საპატრიარქომ ფლორენციაში მიავლინა. მაშინ ჯერ კიდევ მცირერიცხოვან მრევლს დროებით სარგებლობაში გადაეცა ქალაქის ცენტრში არსებული ეკლესიის შენობა, სადაც იმ დროიდან მოყოლებული უკვე წლებია წირვა-ლოცვა ქართულ ენაზე აღევლინება.
მამა ანდრიას გამოჩენა, ერთგვარი სტიმული იყო იქ მცხოვრები ქართველებისათვის. ამ ადამიანმა მაგნიტივით მიიზიდა ეკლესიას, ლოცვასა და ზიარებას მონატრებული ადამიანები. სიმღერისა და ცეკვის ანსამბლის "ნანილა" ჩამოყალიბებაც მამა ანდრიასა და აქტიური მრევლის დიდი დამსახურებაა. ანსამბლი, რომლის წევრებიც ტაძრის მგალობლები და მრევლია, 2013 წლის ნოემბერში აკურთხა და გზა დაულოცა დასავლეთ ევროპის მიტროპოლიტმა მეუფე აბრაამმა (გარმელია). "ნანილამ" უკვე სამი კონცერტი ჩაატარა და უახლოეს მომავალში კიდევ ორი კონცერტის ჩატარებას გეგმავს. უნდა აღინიშნოს, რომ ანსამბლის საქმიანობა მთლიანად საქველმოქმედოა. "სამრევლოს ანსამბლი "ნანილა" კონცერტებს გეგმავს ქალაქებში ემპოლი და რეჯო ემილია. ეს საქველმოქმედო კონცერტები ტარდება დევნილების, შეჭირვებული ადამიანების დასახმარებლად; ვაფინანსებთ ოპერაციებს, ასევე შევძელით ამილახვრების ხუთშვილიანი ოჯახისთვის პატარა სახლი შეგვეძინა. ჩვენი სამომავლო გეგმაც სწორედ ეს არის - სიკეთის კეთება". - ჩვეული სათნო ღიმილით გვითხრა მამა ანდრიამ.
მოძღვარი საქართველოდან გადახვეწილი ქართველებისათვის საზღვარგარეთ ეკლესიების არსებობის მნიშვნელობაზეც გვესაუბრა - "ჩვენი ტაძარი, ტოსკანას რეგიონში მცხოვრები ქართველებისათვის, ერთადერთი ადგილია სადაც ერთმანეთს ხვდებიან და უზიარებენ სიყვარულსაც, ტკივილსაც და მწუხარებასაც. ეს სამრევლო ტაძრები აქაური ქართველებისთვის არის ერთგვარი ოჯახიც და სულიერების კერაც. ვიკრიბებით ღვთის სადიდებლად და ერთმანეთის სიყვარულისთვის. ტაძარი არ გვაძლევს რწმენისა და სამშობლოს სიყვარულის დაკარგვის საშუალებას. არ გვაძლევს საშუალებას, რომ მოვდუნდეთ."
- საქართველოშიც მოღვაწეობდით, გყავდათ თქვენი მრევლი, თუ ახდენთ შედარებას საქართველოში მცხოვრებ და ქვეყნის გარეთ მცხოვრებ მრევლს შორის, თუ არის განსხვავება პრობლემებსა და მრევლის განწყობაში.
- მცდარი წარმოდგენაა, როდესაც ამბობენ, რომ უცხოეთში წამოსულ ადამიანზე ევროპული თავისუფლება და ცხოვრების წესი მავნე ზეგავლენას ახდენს და ცოდვების პროვოცირებას იწვევს. აქ არიან ადამიანები, რომლებიც ცხოვრობენ თავიანთი ოჯახების სიყვარულით, ქართველობის სიყვარულით, რწმენითა და პატიოსნებით. მათი უმრავლესობა ძალიან განათლებული ადამიანია და ეს ადამიანები ძალიან სჭირდებიან საქართველოს. ესენი უმრავლესად არიან დედები, რომლებიც ოჯახებისა და შვილების კეთილდღეობის გამო იმყოფებიან აქ. ისინი პატიოსნად შრომობენ. მათ ევროპული სტილით ცხოვრებისათვის ხშირად არც დრო აქვთ და არც საშუალება.
- მამა ანდრია, მრევლი მუდმივად იზრდება, რა უნდა იყოს ამის მიზეზი?
- ჩემთვის, როგორც მოძღვარისათვის სასიხარულოა მრავალრიცხოვანი მრევლი. ეს ერთის მხრივ ღმერთთან დაახლოების სურვილის მომძლავრებაა მაგრამ, თუ დავფიქრდებით, მრევლის გაზრდა საქართველოდან წამოსული ადამიანების ხარჯზეც ხდება. მრევლი კი მართლაც მუდმივად იზრდება, უმჯობესია, საქართველოს ტაძრებში იმრავლოს მრევლმა, ვიდრე საზღვარგარეთ. ჩვენ, საზღვარგარეთ მოღვაწე მამები, ღმერთის შეწევნით ყველაფერს ვაკეთებთ, რომ სულიერი სიმშვიდის მოპოვებაში დავეხმაროთ სამშობლოდან მოშორებულ ქართველებს. ზემოთ აღნიშნული ღონისძიებაც, სწორედ ამ საქმეს, ჩვენი სამრევლო ტაძრის გაცნობას და მისი არსებობის მნიშვნელობის შეცნობას ემსახურებოდა, რათა მომავალში უფრო მეტი სიკეთის გაკეთება შევძლოთ.
ნინო მამუკაძე
იტალია, ფლორენცია
