2 ოქტომბერს, გოდერძი ჩოხელის 60 წლის იუბილესთან დაკავშირებით მის მშობლიურ სოფელ ჩოხში ღონისძიებები გაიმართება. გოდერძი ჩოხელს ქართველი მწერლები და პოეტები გაიხსენებენ. მოეწყობა მისი ფოტოების გამოფენა, გაიმართება ფოლკლოური ანსამბლების კონცერტი და ტრადიციული კერძების დაგემოვნება.
როგორც მცხეთა-მთიანეთის საინფორმაციო ცენტრს დუშეთის მუნიციპალიტეტის გამგეობის კულტურის სამსახურში განუცხადეს, ღონისძიებაზე ადგილობრივი ბიუჯეტიდან 5 000 ლარამდე დაიხარჯება.

"ჩოხელის საიუბილეო ღონისძიებები ჩოხში 14:00 საათზე დაწყება. გოდერძი ჩოხელის ცხოვრებას გაიხსენებენ, მისი ცხოვრების შესახებ ისაუბრებენ მწერლები, პოეტები, სიტყვით გამოვლენ ერეკლე საღლიანი, ტარიელ ხარხელაური, ნინო ზედელაშვილი, ამირან არაბული. გაიმართება გოდერძი ჩოხელის ცხოვრების ამსახველი სურათების გამოფენა, კონცერტი, ფოლკლორული ანსამბლების მონაწილეობით. წარმოდგენილი იქნება ტრადიციული კერძები, რომლებსაც სტუმრები დააგემოვნებენ. ეს ყველაფერი ღია ცის ქვეშ გვაქვს დაგეგმილი, მაგრამ თუ უამინდობა იქნება სკოლის შენობაში აღვნიშნავთ ჩოხელის იუბილეს", - აღნიშნა კულტურის სამსახურის უფროსმა ქეთევან წიკლაურმა.

მისივე თქმით, ღონისძიებაზე მიწვეულები იქნებიან პრემიერ მინისტრი, მთავრობის წარმომადგენლები და პარლამენტის წევრები.

ცნობილი მწერალი, სცენარისტი და კინორეჟისორი 2 ოქტომბერს 60 წლის გახდებოდა. გოდერძი ჩოხელი 1954 წელს, დუშეთის რაიონში, გუდამაყარში, სოფელ ჩოხში დაიბადა. სოფლის რვაწლიანი სკოლის დამთავრების შემდეგ სწავლა დაბა ფასანაურის საშუალო სკოლაში განაგრძო. 1972 წელს ჩააბარა შოთა რუსთაველის სახელობის სახელმწიფო თეატრალურ ინსტიტუტში, კინომცოდნეობის ფაკულტეტზე, შემდეგ კინოსარეჟისორო ფაკულტეტზე. უნივერსიტეტის დამთავრების შემდეგ კინოსტუდია "ქართულ ფილმში" დამდგმელ რეჟისორად დაიწყო მუშაობა. იყო კინემატოგრაფისტთა კავშირის და მწერალთა კავშირის წევრი. 1997 წლიდან მისი მოთხრობები ჟურნალ-გაზეთებში იბეჭდებოდა.

გოდერძი ჩოხელს გამოცემული აქვს ლექსებისა და მოთხრობების კრებულები: "ბინდისფერი სოფელი", "თევზის წერილები", "შემინახე, დედაო მიწავ!" "სულეთის კიდობანი", "არჩევნები სასაფლაოზე". ლექსების კრებული "ბედი მდევარი". მოთხრობების კრებული "შავი არაგვი", რომელიც არაერთ ენაზეა ნათარგმნი. რომანები - "მგელი" და "მღდვლის ცოდვა".

მისი პირველი წიგნი "წერილი ნაძვებს" 1980 წელს გამოიცა და წლის საუკეთესო პირველი წიგნის პრემიაც მიენიჭა.

გოდერძი ჩოხელის ფილმებს სხვადასხვა კინოფესტივალზე არაერთი პრიზი აქვს მიღებული. 1982 წელს, ობერჰაუზენის საერთაშორისო კინოფესტივალზე მიიღო გრან–პრი ფილმისთვის "აღდგომა". ასევე, გრან პრი ანაპის ფესტივალზე "კინოშოკი" ფილმისთვის "სამოთხის გვრიტები". მონტე–კარლოს კინოფესტივალზე მიღებული აქვს "ვერცხლის ნიმფა" და საერთაშორისო კათოლიკური ეკლესიის პრიზი ფილმისთვის "ცოდვის შვილები". თბილისის "ოქროს არწივის" ფესტივალზე - პრიზები საუკეთესო სცენარისა და საუკეთესო რეჟისურისათვის და ა.შ

გოდერძი ჩოხელი 2007 წლის 16 ნოემბერს, 53 წლის ასაკში, გულის უკმარისობით გარდაიცვალა. ის მცხეთაში, სამთავროს დედათა მონასტერშია დაკრძალული.

წყარო: http://www.icmm.ge/