საქართველოს საპატრიარქოში ხვალ კულტურის სამინისტროსა და ეკლესიას შორის მემორანდუმი გაფორმდება.
როგორც "ინტერპრესნიუსს" კულტურისა და ძეგლთა დაცვის სამინისტროდან აცნობეს, მემორანდუმი ეკლესიის მფლობელობაში არსებული კულტურული მემკვიდრეობის დაცვასა და მოვლა-პატრონობას ითვალისწინებს.
დოკუმენტს ხელს კულტურის მინისტრი გურამ ოდიშარია და ახალციხისა და ტაო-კლარჯეთის მიტროპოლიტი, სრულიად საქართველოს კათოლიკოს-პატრიარქის ქორეპისკოპოსი თეოდორე მოაწერენ.
მემორანდუმის გაფორმებას საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ანთიძე, ევროკავშირის წარმომადგენლობის ხელმძღვანელი ფილიპ დიმიტროვი, იტალიის ელჩი ფედერიკა ფავი და სხვა მაღალი რანგის პირები დაესწრებიან.
სამინისტროს განმარტებით, 2002 წლის 14 ოქტომბერს დადებული კონკორდატის (კონსტიტუციური შეთანხმება საქართველოს სახელმწიფოსა და საქართველოს სამოციქულო ავტოკეფალურ მართლმადიდებელ ეკლესიას შორის) შემდეგ კულტურული მემკვიდრეობის სფეროში სახელმწიფოსა და ეკლესიას შორის მარეგულირებელი დოკუმენტი პირველად იდება.
"მემორანდუმი ევროკავშირის საჯარო სამსახურების დაძმობილების პროექტის (თვინინგი) ფარგლებში ფორმდება, რომელიც 2013 წლის 11 ივნისიდან კულტურული მემკვირეობის დაცვის ეროვნულ სააგენტოში ხორციელდება. გამოცდილებისა და კვალიფიკაციიდან გამომდინარე ევროკავშირის წევრი ქვეყნებიდან პროექტის ძირითად პარტნიორებად შერჩეულ იქნა იტალიის კულტურული მემკვიდრეობის, კულტურული საქმიანობისა და ტურიზმის სამინისტრო და დანიის კულტურის სააგენტო", - აცხადებენ სამინისტროში.