ტაო-კლარჯეთს, ამ უძველეს მამა-პაპათა მიწა-წყალს ახლა უკვე საზღვრის იქით მდებარე მხარედ ვიხსენიებთ. ტაოში მდებარე ეკლესია-მონასტრების მოსალოცად წასულებს საზღვრის გადაკვეთა გვიწევს... რამდენჯერაც არ უნდა მიეახლო იქაურ წმინდა ადგილებს, კიდევ უფრო მეტად გიჩნდება სურვილი ბევრჯერ მოილოცო და მადლით სავსე უკან დაბრუნდე. 18 ოქტომბერს, წმინდა გრიგოლ ხანძთელის ხსენების დღეს განსაკუთერბული ხალხმრავლობაა ხანძთის სავანეში. საქართველოს სხვადასხვა ეპარქიებიდან ჩამოსული ქართველობა, სასულიერო თუ საერო პირები ერთსულოვნად ადიდებენ უფალს. წელს, ღამისთევის ლოცვით შეხვდებიან წმინდა მამის გრიგოლ ხანძთელის ხსენებას და კიდევ ერთხელ შეავედრებენ მის წმინდა სულს ჩვენი ქვეყნის კეთილდღეობას.