ღირსი თეოფილე სარწმუნოების ერთგულების გამო შეიმოსა მოწამის გვირგვინით. მუსლიმმა არაბებმა მას ქრისტეს რჯული ვერ დაათმობინეს და სიკვდილით დასაჯეს.
წმინდა მოწამე თეოფილე დაიბადა და გაიზარდა კონსტანტინოპოლში იმპერატორ კონსტანტინე VI-ისა და მისი დედის, ირინეს მმართველობისას. იგი ბერძენთა ლაშქრის მხედართმთავარი და სენატორი გახლდათ. თეოფილე 780 წელს არაბებთან ერთ-ერთი ბრძოლის დროს მტრებმა ტყვედ ჩაიგდეს. უსჯულოები ამაოდ ეცადნენ წმინდანის გადადრეკას ჭეშმარიტი სარწმუნოებიდან, ბრძოლაში მამაცს და უშიშარს, სიკვდილი ერჩივნა ქრისტეს უარყოფას. არაბებმა ტყვე მხედართმთავარი კუნძულ კვიპროსზე საპყრობილეში ჩააგდეს. ოთხი წლის შემდეგ ნეტარ მოწამეს თავი მოჰკვეთეს.
